Сенат төрағасы Мәулен Әшімбаев Қазақстанның сыртқы қарызы жайлы пікір білдірді. Сенат кулуарында журналистер сұрағына жауап берген Әшімбаев бұл мәселеге алаңдаушылық танытты, деп хабарлайды Stan.kz ақпарат агенттігі.
«Бұл өте күрделі мәселе. Біз мемлекеттік қарыз бойынша сауалды былтыр да көтердік, қарыздың ұлғайып баратынын сынға алдық. Бюджетті талқылау аясында мемлекеттік қарыз туралы сауалды қайта қарастырамыз», – деді сенат төрағасы.
«Ұлттық қордан алынатын мақсатты трансферттің көлемін азайтуды сенаторлар үкіметтен талап ете ме?» деген сауал Әшімбаевқа қойылды.
«Қазір айту қиын. Кеше ғана жобаны мәжілістегі әріптестеріміз қарастырды, бүгін бізге бюджет жобасы түсуі тиіс. Оны зерттеп, жіті қарап, сұрақтар болса, міндетті түрде көтереміз, үкімет мүшелерімен сөйлесеміз», – деді Сенат спикері.
Сенаторлар бюджетке енгізетін өзгерісті 5 мамыр күні қарастырады.
20 сәуір күні мәжіліс 2022 жылға арналған бюджетке енгізілген өзгерістерді мақұлдады.
