Жетісу облысының Төтенше жағдайлар департаменті Алакөл ауданының таулы аймағында болған өрттің жаңа мәліметтерін айтты, – деп хабарлайды Tengrinews.kz тілшісі.
Төтенше жағдайлар департаментінің мәліметінше, 9 қыркүйек таңертеңгі жағдай бойынша өрттің жалпы аумағы 200 гектар, бұл кешегі мәліметтермен салыстырғанда екі есе көп.
«2022 жылдың 9 қыркүйегінде таңғы сағат 8-ден бастап Ми-8 тікұшағы өрт ошақтарын анықтау үшін ұшып кетті. Ұшып кеткеннен кейін су шашу жұмыстары қайта жанданды. Өрт сөндіру жұмыстары таулы жер болғандықтан және ауа райына байланысты қиындады. Өрт болған аймақта желдің екпіні секундына 20 метрге дейін жетеді», – делінген хабарламада.
Өртті сөндіруге 173 адам, бір тікұшақ, 16 техника, 70 рюкзак бүріккіш және алты ат жұмылдырылған. Әзірге зардап шеккендер жоқ.
