Бүгін 16 желтоқсан Тәуелсіздік күні Алматыдағы Республика алаңында белсенді Жанболат Мамай бастаған тіркелмеген Демократиялық партиясының өкілдері Желтоқсан құрбандарын еске алды. Белсенділер қаза тапқан боздақтарға құран бағыштап, Жаңаөзен оқиғасын да көтерді, деп хабарлайды Stan.kz ақпарат агенттігі.
Республика алаңында сағат 11:00-ден бастап мобильді интернет жұмысы нашарлады. Еске салайық, бір күн бұрын Жанболат Мамай халықты 12:00-де Желтоқсан құрбандарына арналған ескерткіштің жанына жиналуға шақырған еді.
Алаңды бақылап жүрген полицейлердің саны көбейді. Көліктердің жүрісіне де шектеу қойылып, көшелер жабылды. Желтоқсан көшесінің төменгі жағында полиция көліктері тұрды.
Әкімдікке қарсы тұрған алаңда жүрген шерушілердің саны шамамен жүз шақты адам болды. Олар қолдарына плакат ұстап, Жаңаөзен шындығының ашылуын талап етті.
Жиналғандар Тәуелсіздік монументінің жанына келіп, кезек кезекпен өз пікірлерін айтты.
Біраздан соң әкімдік пен прокуратура өкілдері еліп, шараның заңсыз өткізіліп жатқанын ескертті. Бірақ жиналғандар олардың сөздеріне құлақ аспады.
Алаңда сондай-ақ Oyan, Qazaqstan жастар қозғалысының он шақты өкілі Желтоқсан және Жаңаөзен оқиғасы құрбандарын еске алып, арт-перформанс шарасын өткізді. Перфомансты ұйымдастырушылар нысананың суреті бар ақ костюм киіп, қызыл бояу жағып алған. Олар осылайша оқиға құрбандарын бейнелеуге тырысқан. Жиналғандар мен өткінші адамдар оларды видео мен фотоға түсіріп жатты.
