Қазақстанда дәрігерлердің коронавирусқа байланысты төленетін үстемақысы алынып тасталған болатын. Төлемдер ерте тоқтатылмады ма? Осыған байланысты медицина қызметкерлерінің жалақысы көбейетін бола ма? Бұл сұрақтарға денсаулық сақтау министрі Алексей Цой жауап берді, деп хабарлайды Stan.kz ақпарат агенттігі.
“Біріншіден, төлем туралы шешім елімізде эпидемиологиялық жағдай өршіп, төтенше жағдай жарияланған тұста енгізілген. Бұл кезең былтыр болды. Бірақ осыған қарамастан мемлекет төлемдер төлеп келді. Қазіргі таңда дәрігерлердің 99 пайызы вакцинацияланған. Демек олар қазір қорғанған. Қазір олардың вирустан сақтануға мүмкіндіктері бар. Ал ол уақытта ешқандай жағдай жасалмады. Иә, олардың жалақысы қосымша төленген төлемдерге жетпеуі мүмкін. Тіпті, ковид болсын, болмасын медициналық қызметкерлер қауіпті аймақта қауіпті инфекциямен жұмыс істеп жүр. Агрессивті аймақта жұмыс істейтін қызметкерлер үстемақы алатын болады. Қандай коэффицентте қосылатынын біз қаржы министрлігімен бірлесіп ақылдасып жатырмыз. Әр жыл сайын біз дәрігерлердің жалақысын 30 пайызға көтеріп жатырмыз. Осылайша олардың орташа жалақысы – 500 мың деңгеге дейін жететін болады”, – дейді министр Алексей Цой.
