Республиканың бірнеше өңірінде күн қатты суытады.
Синоптиктер 12 қыркүйеккке арналған ауа райы болжамын жариялады, деп хабарлайды Azattyq Ruhy.
«Қазақстан аумағының басым бөлігі солтүстік-батыс антициклонның ықпалында болады, соған байланысты ауа райы жауын-шашынсыз болуы ықтимал. Еліміздің тек солтүстігі, шығысы және оңтүстік-шығысы әлі де циклондық қызмет пен атмосфералық фронттардың ықпалында болады, жаңбыр жауады, шығыста, оңтүстік-шығыста – қатты жаңбыр, найзағай болады», – делінген «Қазгидромет» хабарламасында.
Түнде Алматы облысының таулы аудандарында қатты жауын-шашын болуы мүмкін (жаңбыр жылбысқы қарға ауысады). ҚР бойынша желдің күші 15-23 м/с, еліміздің шығысы мен оңтүстік-шығысында екпіні 23-28 м/с, күндіз Маңғыстау облысында шаңды дауыл соғады.
Еліміздің солтүстігінде, солтүстік-батысында – түнде және таңертең тұман болады. Күндіз Жамбыл облысының таулы аудандарында бұршақ жаууы ықтимал.
Қызылорда, Түркістан, Жетісу облыстарының басым бөлігінде, Абай облысының оңтүстігінде, шығысында, солтүстігінде, орталығында, Шығыс Қазақстан облысының солтүстік-шығысында, Атырау облысының батысында төтенше өрт қауіпі, Қостанай облысының оңтүстігінде жоғарғы өрт қауіпі сақталады.
Түнде Ақмола облысының солтүстік-батысында, Солтүстік Қазақстан облысының солтүстік-шығысында, Қостанай, Батыс Қазақстан, Ақтөбе облыстарының солтүстігінде топырақ бетінде 1-2 градус үсік жүреді.
