Жұмыс кестесі – 9.00-ден 18.00-ге дейін (дүйсенбі-жұма).
Әзірше Алматы, Алматы және Жамбыл облыстарының мамандандырылған ХҚКО-лары ашылмады. Бұл өңірлердің ХҚКО-ларында қашан жұмыс басталатыны қосымша хабарланатыны айтылды.
«Автоқызметтер сұранысқа ие мемлекеттік қызметтердің бірі болып қала береді. Қазір мамандандырылған ХҚКО-лардың жұмысы қайта жанданып жатыр, тұтынушылардың келуін күтеміз. Сондықтан осы жағдайға түсіністікпен қарауларыңызды сұраймыз. Сондай-ақ, автокөлікті Kaspi және Halyk Homebank банк қосымшалары арқылы қайта ресімдеуге болатынын еске саламын. Мамандандырылған ХҚКО-ларда дүрбелең туғызбау үшін осы қызметті пайдалануды ұсынамын», – деді «Азаматтарға арналған үкімет» мемлекеттік корпорациясының басқарма төрағасы Әділ Қожықов.
Мамандандырылған ХҚКО ғимаратына кіру Ashyq қосымшасы арқылы жүзеге асырылады. Эпидемиологиялық жағдайға байланысты тұтынушылар санитарлық қауіпсіздік ережелерін сақтауы керек, әлеуметтік қашықты сақтап, бетперде тағу қажет.
