Алматы қаласы Жастар саясаты басқармасы мен Төтенше жағдайлар департаменті бірлесіп, жастар арасында сейсмикалық қауіпсіздік мәдениетін қалыптастыру мақсатында ақпараттық іс-шараларды жүйелі түрде өткізіп келеді. Бұл бастама — еліміздің ең сейсмикалық белсенді аймақтарының бірі саналатын Алматыда жастардың төтенше жағдайларға дайындығын арттыруға бағытталған маңызды қадам.
Жоғары оқу орындарында тұрақты негізде өткізіліп жатқан шаралар барысында студенттерге жер сілкінісі, табиғи апаттар және төтенше жағдайлар кезінде өзін-өзі ұстау ережелері мен қауіпсіздік алгоритмдері кеңінен түсіндірілуде. Сонымен қатар, өрт қауіпсіздігі, алғашқы медициналық көмек көрсету және зардап шеккендерге психологиялық қолдау көрсету сияқты өмірлік маңызы бар тақырыптар қамтылуда.
Шараның басты мақсаты — жастардың дағдарыс жағдайында дұрыс шешім қабылдау, сабыр сақтау және тиімді әрекет ету қабілеттерін дамыту. Алматы сейсмикалық тұрғыдан аса күрделі аймақ болғандықтан, әрбір азаматтың, әсіресе жастардың, төтенше жағдай кезінде өз өмірін қорғау және басқаларға көмек көрсете білуі қоғам қауіпсіздігі үшін аса маңызды.
Шараға қатысушы студент Айдана Серікқызы өз әсерімен бөлісті:
«Бүгінгі шарада мен көптеген пайдалы ақпарат алдым. Әрбір азамат төтенше жағдайда қандай әрекет ету керектігін білуі керек деп ойлаймын. Мұндай шаралар тағы ұйымдастырылса, міндетті түрде қатысар едім.»
Алдағы уақытта бұл ақпараттық бағдарламалар тек жоғары оқу орындарымен шектелмей, қаладағы барлық комьюнити орталықтарында да ұйымдастырылатын болады. Жастарға арналған интерактивті кездесулер, симуляциялық жаттығулар мен практикалық сабақтар арқылы қауіпсіздік дағдылары одан әрі жетілдіріледі.
Ақпараттық жұмыс — төтенше жағдайлардың алдын алудың ең тиімді тәсілі. Қауіп-қатер туындаған сәтте ғана емес, оған алдын ала дайын болу — заманауи қоғамның басты қағидаларының бірі. Осы орайда Жастар саясаты басқармасы мен Төтенше жағдайлар департаментінің бірлескен бастамасы жастардың қауіпсіздік саласындағы сауаттылығын арттыруға бағытталған жұмысын жүйелі түрде жалғастыруда.
