Қазақстанда коронавирусты анықтауға арналған экспресс-тесттердің өндірісі басталды. Мұндай тесттер вирусты 15 минутта анықтауға мүмкіндік береді және жас шектеуі жоқ. Зауыт Жамбыл облысында орналасқан, деп хабарлайды Stan.kz ақпарат агенттігі.
Бұл туралы премьер-министрдің Жамбыл облысына жасаған іс-сапары кезінде мәлім болды.
«Қазан айында «Амир и Д» ЖШС-де COVID-19 антигенін анықтауға арналған экспресс-тесттердің өндірісі басталды. Мұнда экспресс-тесттердің 200-ге жуық түрін жасау жоспарланған. Олардың қатарында инфекциялық ауруларды, кардиологиялық маркерлерді, есірткі заттарын, аллергендерді анықтауға арналғандары да бар», – делінген премьер-министрдің баспасөз қызметі хабарламасында.
Зауытта жылына 15 млн экспресс-тест және 1,5 млн тексеріске арналған ерітінді өндірілмекші.
Мұндай экспресс-тесттер иммунохроматография әдісі негізінде жұмыс істейді және жұтқыншақтағы SARS-CoV-2 антигенін анықтауға бағытталған. Тест коронавирустың бар-жоғын жылдам әрі дәл көрсетеді және жас шектеуі жоқ.
Айта кетейік, бұған дейін Алматы бас санитар дәрігері Жандарбек Бекшин мектептерде экспресс-тесттерді қолдануды ұсынған болатын. Ол өз мәлімдемесінде Ресей мамандарының бұл әдістің тиімділігі жайлы хабарлағанын айтқан еді.
