Қарасай көпсалалы ауданаралық ауруханасында Ашық есік күні өтті

Балалар жылы аясында Қарасай көпсалалы ауданаралық ауруханасына Нұрсұлтан қаласындағы «Ұлттық ғылыми медицина» орталығының кардиолог дәрігері Ахмолдаева Әсия Ақылбекқызы арнайы шақыртумен келіп, балаларды тексеруден өткізді.
«Елімізде кардиологиялық, кардиохирургиялық және аритмогендік патологиясы бар балалар жиі кездеседі. Мұндай диагнозды ерте кезеңде анықтап және оның алдын алу маңызды. Сондықтан балалардың денсаулығын жиі тексеріп отыру қажет», – деді ол.
Қарасай көпсалалы ауданаралық ауруханасы басшыларының бастамасымен ұйымдастырылған Ашық есік күні білікті маман 35-тен астам сәбиді қабылдап, ата-аналарға қауіпсіздік шаралары мен патологияның алғашқы белгілері туралы кеңес берді. Ұйымдастырушылар балаларға арналған акцияларды жиі өткізуді жоспарлап отыр.
«Балалардың денсаулығын жақсарту мақсатында біздің өңірге білікті кардиолог маманды шақырып, балаларды тексеруден өткіздік. Балаларға медициналық көмек қолжетімді болуы үшін ендігі кезекте өзге де бейінді мамандарды шақыруды жоспарлап отырмыз», – деді аурухананың бас дәрігері Малғаждаров Мәулен Сансызбайұлы.
Жалпы, ұлттық ғылыми медицина орталығының мамандары шалғай аудандар мен елді мекендердің тұрғындарын жиі тексеруден өткізіп тұрады.