Әлемнің 21 елінде коронавирус инфекциясының беті қайта бастады. Бұл туралы Денсаулық сақтау министрі Алексей Цой Үкімет отырысында мәлімдеді.
«Бүкіл әлемде коронавирус инфекциясын жұқтырғандар саны тәулігіне 300 мыңның төңірегінде болып отыр. Елді есеңгіреткен дерттен осы күнге дейін 5 миллионға жуық адам қайтыс болды. Дүниежүзілік денсаулық сақтау ұйымының Еуропа аймағындағы мәліметтері бойынша, соңғы екі аптада 54 елдің 33-інде аурудың өсуі байқалған. Соңғы уақытта әсіресе Польшада сырқаттар саны артып отыр. Көрсеткіш 122%-дан асқан. Грузияда – 98%, Украинада – 69%, Венгрияда – 50%-дан астам, Арменияда – 40%-дан астам, Ресейде – 30%, Молдовада – 20%-дан астам, Түркия, Аустрия және Германия, Қырғызстан, Беларусь елдерінде 2-ден 10%- ға дейін өскен», – деді Алексей Цой.
Алайда, Қазақстандағы жағдай өзге елдермен салыстырғанда көш ілгері. Атап айтқанда, бізде сырқаттану деңгейі 17 пайызға төмендеген.
«Сырқаттану көрсеткіші Израильде 61%, Испанияда 43%, Швейцарияда 39%, Черногорияда 24%, Италияда 22%, Францияда 16%, Әзербайжанда 7%-ға түскен. Қазақстанда кейінгі екі аптада сырқаттану 17%-ға төмендеді», – деді денсаулық сақтау министрі.
Денсаулық сақтау министрі Алесей Цой Үкімет отырысында 20 қазаннан бастап Қазақстанда карантин шаралары жеңілдейтінін айтты.
