Түркістан облысы ПД Есірткі қылмысына қарсы іс-қимыл басқармасының қызметкерлері Түлкібас аудандық полиция бөлімімен бірлесіп, есірткі құралдарын сақтау және өткізу фактілерінің жолын кесті.
Мәселен жедел уәкілдер есірткі сақтады деген күдікпен Сайрам ауданының тұрғынын ұстады. Сезіктіден марихуана салынған 1 полиэтилен пакет тәркіленді. Сондай-ақ, ер адам есірткі затын Түлкібас ауданының тұрғынынан сатып алғанын жеткізді.
Полицейлер одан әрі жедел-іздестіру іс-шаралары барысында, есірткі сатуға қатысы бар екі күдіктіні, Түлкібас ауданының тұрғындарын ұстады. Тінту кезінде жедел уәкілдер олардан 2 қағаз орамасын, 2 шыны ыдысқа салынған және 1 полиэтилен пакеттегі есірткіге ұқсас затты тапты.
Аталған жайт ҚР ҚК-нің 297-бабы «Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу» бойынша тіркеліп, сотқа дейінгі тергеп-тексеру амалдары жүргізілуде.
Қорытындыға сәйкес алынған есірткі заттары жалпы салмағы 3,5 келіден асатын «кептірілген марихуана» болып шықты.
Қазіргі уақытта жедел-іздестіру іс-шаралары жалғасуда. Күдіктілер қамауға алынды. Оқиғаның толық мән-жайы анықталуда.
Түркістан облысы ПД баспасөз қызметі
