Еліміздің ғылым саласының дамуына елеулі үлес қосып, саналы ғұмырын халқына қызмет етуге арнаған азаматтардың бірі – гидрогеология ғылымының ардагері, ғылым докторы, халықаралық академияның мүшесі, Қазақстан Республикасының білім саласында берілетін Әл-Фараби атындағы мемлекеттік сыйлықтың лауреаты, Қазақстанға еңбегі сіңген Геолог, «Батыс Қазақстан облысының жерасты сулары» кітабының авторы, қоғам қайраткері Рахматулла Кенжебекұлы Аязбаев.
Көп жылдық ғылыми қызметінде ол гидрогеология саласының дамуына, табиғи ресурстарды зерттеу мен тиімді пайдалануға бағытталған маңызды ғылыми еңбектер жазып, отандық ғылымның өркендеуіне өзіндік үлесін қосты. Оның ғылыми зерттеулері мен қоғамдық қызметі жоғары бағаланып, мемлекетіміздің дамуына қосқан еңбегі үшін «300 Қайраткер» тізіміне енгізілді.
Рахматулла Кенжебекұлы тек ғалым ғана емес, ел мүддесін бәрінен биік қоятын қоғам жанашыры ретінде де көпшілікке танымал. Ол қайырымдылық пен демеушілік жұмыстарды азаматтық парызы санап, мұқтаж жандарға көмек көрсетуді өмірлік ұстанымына айналдырған.
Мемлекет басшысы Қасым-Жомарт Тоқаев өз сөздерінің бірінде: «Қайырымдылық жасау – халқымыздың бойындағы асыл қасиеттердің бірі. Жомарттық пен жанашырлық қоғамымыздың берекесін арттырып, ел бірлігін нығайтады», – деп атап өткен болатын. Бұл қағидат Рахматулла Кенжебекұлының өмірлік ұстанымымен үндесіп жатыр.
Ол әсіресе білімді жастарды қолдауға, олардың сапалы білім алуына және зияткерлік әлеуетін дамытуға ерекше көңіл бөледі. Жас ұрпақтың болашағы біліммен байланысты екенін жақсы түсінетін ғалым көптеген білім беру және әлеуметтік жобалардың жүзеге асуына қолдау көрсетіп келеді.
Биылғы жылы оның бастамасымен және демеушілігімен қамқоршысы жоқ 300 балаға шахмат тақталары тарту етілді. Бұл игі іс балалардың логикалық ойлау қабілетін дамытып қана қоймай, олардың білімге деген қызығушылығын арттыруға бағытталған маңызды қадам болды. Шахмат – ой-өрісті кеңейтетін, сабыр мен стратегиялық ойлауды қалыптастыратын зияткерлік ойын. Сондықтан бұл сыйлықтың тәрбиелік әрі білімдік маңызы ерекше.
Қайырымдылық – бір күндік науқан емес, ол жүректен шығатын ізгілік. Рахматулла Кенжебекұлы осы ұстанымды нақты істерімен дәлелдеп келеді. Оның жастарға, білім беру ұйымдарына және әлеуметтік тұрғыдан қолдауды қажет ететін азаматтарға көрсетіп жүрген көмегі көпшілікке үлгі боларлықтай.
Ғылымдағы жетістіктері, қоғамдық қызметі және қайырымдылық бағытындағы игі бастамалары арқылы Рахматулла Кенжебекұлы ел дамуына сүбелі үлес қосып келе жатқан тұлға. Осындай азаматтардың арқасында қоғамда мейірім мен жанашырлық құндылықтары нығайып, өскелең ұрпаққа өнеге болатын игі істер жалғасын табуда.
Ғалымның өнегелі өмір жолы мен қайырымды істері жас буынға рухани күш беріп, қоғам игілігі үшін қызмет етудің жарқын үлгісі болып қала береді.
