Биыл жоспар бойынша мұнай өңдеу көлемі 17,9 млн тоннаны құрайды, деп хабарлайды Azattyq Rýhy тілшісі.
Оның ішінде автобензин ˗ 4 985 мың тонна, дизель отыны – 5 133 мың тонна, авиаотын – 686,7 мың тонна.
Бұл туралы Президенті жанындағы Орталық коммуникациялар қызметінде өткен жиында Энергетика министрі Болат Ақшолақов мәлімдеді.
«Биыл 2 ақпандағы жағдай бойынша дизель отынының жиынтық қалдықтары 315,4 мың тоннаны құрайды. АИ-92 маркалы бензин қоры 299,2 мың тоннаны құрайды. Сондай-ақ Энергетика министрінің 2022 жылғы 6 қаңтардағы №2 бұйрығына сәйкес Қазақстан Республикасында мұнай өнімдерін бөлшек саудада өткізудің шекті бағалары 180 күнге мына деңгейде белгіленген: АИ-92 маркалы бензиніне – литріне 182 теңге, АИ-93 маркалы бензиніне – литріне 182 теңге, АИ-95 маркалы бензиніне – литріне 215 теңге, дизель отынының бағасы Ақмола, Ақтөбе, Шығыс Қазақстан, Батыс Қазақстан, Қостанай, Солтүстік Қазақстан облыстарында – литріне 260 теңге, Нұр-Сұлтан, Алматы, Шымкент қалаларында, Алматы, Атырау, Жамбыл, Қарағанды, Маңғыстау, Қызылорда, Павлодар, Түркістан облыстарында – литріне 230 теңге», – дейді министр.
Оның айтуынша, 180 күннен кейін мұнай өнімдеріне баға белгілеу бойынша министрлік мүдделі мемлекеттік органдармен бірлесіп, қосымша шаралар әзірлеп жатыр, ол кейінірек хабарланады.
