Экология министрі Серікқали Брекешев биыл қазақстандықтардың кәдеге жарату төлемдерінен шамамен 700 миллиард теңге жиналатынын айтты, – деп хабарлайды Tengrinews.kz тілшісі.
Министр кәдеге жарату төлемдері бойынша алынатын барлық сомадан шамамен 12 миллиард теңге қатты тұрмыстық қалдықтар мен автокомпоненттерді жинауға, тасымалдауға және қайта өңдеуге кететінін мәлімдеді.
«Одан бөлек, істен шыққан автокөлік құралдары мен ауыл шаруашылығы техникасын кәдеге жаратуға шамамен осындай қаражат кетеді. «Жасыл даму» өзінің инвестициялық саясаты негізінде жұмыс істейтінін тағы да айтқым келеді. Алдына ала болжам бойынша биыл 690-700 миллиард теңге жинау жоспарланған», – деді министр.
Бұған дейін министрлік утильалымға байланысты жаңа мәлімдеме жасаған. 23 мамырдан бастап қазақстандықтар утильалымы төленбеген көліктерін төмендетілген мөлшерлемемен тіркей алады.
