Ақпарат және қоғамдық даму министрі Асқар Омаров елде заң бұзбаса, Қазақстанда ресейлік телеарналардың ақпарат таратуына тыйым салу үшін ешқандай себеп жоқ екенін айтты, деп хабарлайды Stan.kz ақпарат агенттігі.
Министрдің сөзінше, Қазақстанда кабельдік желі арқылы ақпарат тарату провайдер мен телеарна арасындағы құқықтық келісімшарт негізінде жүзеге асады.
«Мемлекет бұл процеске араласпайды, тек министрлік сол телеарнаның өкілдігі мемлекет аумағында болуын талап ете алады. Екіншіден, тағы да министрлік 15 телеарна кіретін бірінші міндетті кабельдік желімен қамтамасыз етеді. Қазір бұл пакетті кеңейту жұмыстары жүріп жатыр. Ал шетелдік телеарналар – тұтынушының таңдауы. Егер азамат Қазақстан Республикасының заңын бұзып, қандай да бір әрекетке шақырғанын байқаса, өтініш, тиісті құқық қорғау органдарына шағым түсіріңіз. Тағы да қайталаймын, шетелдік телеарналар тек кабельдік желі арқылы ақпарат таратады және онда түрлі елдің арналары ұсынылған. Олар провайдер және арна арасында келісімшарт арқылы қарым-қатынас орнатады», – деп түсіндірді министр.
Асқар Омаров бұл жағдайға қатысты мемлекет пен ақпарат министрлігі әрекетсіздік танытты деп санамайды.
