Қазығұрт АПБ-ға Алматы-Термез тас жолы «Қазығұрт асуында» жол апаты орын алғаны бойынша хабарлама келіп түсті.
Анықталғандай, патрульдік полиция батальонының қызметкері терезесін күңгірттеп алған «Mercedes-Benz Е-350» маркалы көлігіне әкімшілік шара көріп тұрған сәтте, Шымкент бағытына қарай кетіп бара жатқан «Лада 21015» маркалы автокөлігінің жүргізушісі абайсызда артынан келіп соққан.
Өз кезегінде «Mercedes-Benz Е-350» көлігі өзінің алдында тұрған полицейдің «KIA RIO» маркалы қызметтік көлігіне соқтығысқан. Осылайша бірнеше көлікке материалдық шығын келтірілді. Адам шығыны жоқ.
Жол апаты салдарынан «Лада 21015» көлігінің жүргізушісі мен 2 жолаушысы түрлі дене жарақаттарымен орталық ауруханаға түсті. Аталған жайт ҚР ҚК-нің 345-бабы 2-бөлігі бойынша тіркеуге алынды. Қазіргі таңда тергеу амалдары жүргізілуде. Жалпы күн суытып, ауа райы қолайсыз болған сәтте жол-көлік оқиғалары жиілеп кетеді. Осындай олқылықтардың алдын алу, болдырмау мақсатында Түркістан облысының полицейлері профилактикалық шараларды ұдайы іске асырып отырады. Жол апаты жиі болатын аумақтарда қауіпсіздікті қамтамасыз етіп, патрульдеу жұмыстарын атқарады.
Түркістан облысы ПД баспасөз қызметі
