Қыста сырттағы суық пен үй ішіндегі ылғалдылық бас терісінің қабыршақтануы мен қышуын тудырып, салдарынан қайызғақ пайда болады. Бұл көпшілікке ұнамауы мүмкін, өйткені қайызғақ ыңғайсыздық тудырады. Дерматолог Мона Садегпур қайызғақтан қалай құтылуға болатынын айтты, – деп хабарлайды Massaget.kz тілшісі.
Дәрігердің айтуынша, үй жағдайында шашты жиі жу арқылы қайызғақтан құтылуға болады.
Ал қайызғақтан жүйелі түрде зардап шегетін адамдар ауруын емдеу үшін арнайы сусабын қолдана алады. Мұндай сусабынның құрамында мырыш пиритионы, салицил қышқылы, күкірт, селен сульфиді, кетоконазол немесе көмір шайыры секілді заттардың кем дегенде біреуі болуы шарт. Сусабынды қолданар алдында нұсқаулықты мұқият оқу қажет, себебі кейбір сусабындарды бас терісіне жағып, шамамен 5-10 минутқа қалдыру керек.
Сусабынның бір ғана түрі көмектеспесе, құрамында белсенді заттары барларымен алмастырып отыруыңызға болады. Сонымен қатар, Мона Садегпур қайызғақты кетіруге шаш түріне сәйкес келетін сусабын қолдану әсер ететінін де айтты. Мысалы, шаш талшықтары жұқа немесе табиғи түзу, қатты немесе бас терісі майлы адамдарға шашын жиі жуған жөн. Яғни, шашын күн сайын немесе күн ара жуып, қайызғақтан құтылуға арналған сусабынды аптасына екі рет қолданғаны дұрыс.
Керісінше, шашы қалың немесе бұйра адамдарға бас терісі майланған жағдайда ғана аптасына бір рет арнайы сусабынмен жуу ұсынылады. Олар сусабынды шашқа емес, бас терісіне жағуы керек, өйткені өнім құрамындағы заттар шашты құрғатуы мүмкін.
Айта кетейік, бұған дейін қайызғақтың не үшін пайда болатыны хабарланған болатын.
