Отырар аудандық полиция бөлімі қызметкерлерінің ұйымдастыруымен, Шәуілдір ауылында орналасқан Ш.Қалдаяқов атындағы мектеп-гимназиясында «Жас сақшы» полиция сыныбы ашылды. Жастарды өз Отанын сүюге, ел тыныштығын күзету мен ұлттық әскер сапында адал қызмет атқаруға баулитын сыныпқа ауданның құрметті азаматы, Ұлы Отан соғысының ардагері, милиция полковнигі Ерсұлтан қажы Аманбайұлының аты берілді.
Бұл салтанатты шараға аудан әкімінің орынбасары А.Құлмаханов, Түркістан облысы Полиция департаменті Тәрбие және кадр жұмысы басқармасының бастығы Мақсат Асқаров, Түркістан облысы Ішкі істер органдары мен Ұлттық ұлан ардагерлер алқасының төрағасы Оспанғазы Жанқожаев және аудандық ардагерлер алқасының төрағасы Жұмахан Әбдікадыров қатысты.
Іс-шара барысында ел тыныштығын күзетуге елеулі үлес қосқан Ерсұлтан Аманбайұлының өмір жолы туралы деректер айтылып, жиналған көпшілікке ерлігі дәріптелді.
Өз кезегінде полиция сыныбының алғашқы мүшелері атанған 9 сынып оқушылары Отанының ержүрек, әрі батыл қорғаушысы болуға дайындалумен қатар, әрдайым ізденуге, оқуда озат, елінің патриоты ретінде қатарластарына үлгі болуға ант берді.
Түркістан облысы ПД баспасөз қызметі
