«Жайдарман» сахнасында чемпион атанғаннан кейін, отандық киноның дамуына өз үлесін сценарист ретінде қосып жүрген Абылайхан Қасымов енді экран артында емес кадр ішінде халыққа танылмақ. Ол өз талантын 20 бөлімді мелодрама “Айжан” жобасында сынамақ. Қаншама жылдар актерлерге сценарий жазып келген ол енді өзін басқа қырынан танытпақ. Абылайхан Қасымов сериалда Бақыт деген «бай» жігіттің рөлін сомдайды. Оның кейіпкері өмірінде үлкен құпияны жасырып жүр, ал оқиға барысы көрермендерді күтпеген жағдайлармен таңғалдырмақ.
Абылайхан – актер ретіндегі дебют
Бұл жоба Абылайханның актерлік мансабындағы алғашқы тәжірибесі. Ол өзінің жаңа рөлін ерекше ықыласпен қабылдап, актерлік шеберлігін көрсетуге барын салды. Сериалдың продюсерлері оның экрандағы харизмасына және рөлін шынайы жеткізу қабілетіне жоғары баға берді.
“Актерлік – мүлдем бөлек өнер. Сценарий жазу кезінде сен кейіпкерлердің мінезін, сөзін және әрекеттерін ойдан құрасаң, актер ретінде ол кейіпкердің шынайы өмірде қалай өмір сүретінін сезініп, жан бітіресің,” – деді Абылайхан.
Режиссердің ассистенті ретіндегі тәжірибе
Бұл жоба Абылайхан үшін тек актерлік дебют қана емес. Ол “Айжан” жобасында режиссердің ассистенті ретінде де жұмыс істеп жүр. Бұл оның ассистент ретіндегі бесінші жобасы. Бұған дейін ол “Қызық Таймс”, “Пәленшеевтер”, “Бәсеке” және скетч-ком “Эпл Сити” секілді жобаларда осы лауазымда табысты еңбек еткен. Режиссерлік ассистент болу Абылайханға түсірілім процесін тереңірек түсінуге және шығармашылық процестің әр қырын меңгеруге мүмкіндік берді. Оның айтуынша, бұл рөл сценарий жазудағы жаңа идеяларды табуға да көмектеседі.
Абылайханның шығармашылығы оның тек сценарист қана емес, киноөндірістің басқа салаларында да өзін дәлелдей алатынын көрсетіп отыр. Оның актер ретіндегі дебюті мен ассистент ретіндегі тәжірибесі оның жан-жақтылығын және өнерге деген шексіз махаббатын дәлелдейді.
“Мен әрқашан өзімді жаңа нәрселерде сынап көруді ұнатамын. Бұл маған өсіп, шығармашылығымды кеңейтуге мүмкіндік береді. Актерлік мен үшін үлкен сынақ болды, бірақ бұл менің болашақ шығармашылығыма жаңа көзқарас қосатынына сенімдімін,” – дейді жас актер.
“Айжан” мелодрамасы жақында жарыққа шығады. Абылайханды сценарист ретінде танитын қалың көпшілік Абылайханның жаңа қырын көруге асық. Бұл жоба тек сериал ғана емес сондай-ақ шығармашылық адам үшін жаңа белес. Абылайханның болашақта тағы қандай рөлдерді сомдайтынын және қандай жобаларды қолға алатынын асыға күтеміз!
