Әл-Фараби атындағы Қазақ ұлттық университетінде «Іс жүзіндегі әлеуметтік жұмыс: Орталық Азиядағы тұрақты дамуды жақындату мен ілгерілетудің пәнаралық және жаһандық стратегиялары» тақырыбында ірі халықаралық ғылыми-тәжірибелік конференция басталды. Қатысушылар географиясы 27-ден астам елді қамтыды, бұл ауқымды шараның аймақтағы әлеуметтік қорғау және гуманитарлық даму мәселелері талқыланатын беделді сараптамалық алаңдардың біріне айналуына мүмкіндік берді.
Пленарлық отырыстың ашылуында сөз сөйлеген ҚазҰУ ректоры Жансейіт Түймебаев қазіргі заманғы әлеуметтік жұмыстың бір мамандық шеңберінен әлдеқашан асып, тұрақты қоғамның базалық инфрақұрылымына айналғанын және білім сапасы адамдардың қаншалықты жақсы өмір сүріп жатқанымен тікелей байланысты екенін атап өтті.
Ректордың айтуынша, университет білім, жауапкершілік және қоғамдық игілікке сарамандық үлес қосатын кеңістік болуы тиіс. Осы тұрғыда әлеуметтік жұмыс қоғамның өзекті міндеттерін шешуге және адамның абыройын қорғауға тікелей байланысты бағыт ретінде ерекше орын алады.
Гонконг Политехникалық университетінің (PolyU) әлеуметтік жұмыс және криминология кафедрасының меңгерушісі, профессор Эрик Чуй да пәнаралық тәсілді жақтайтынын айтты. Ол жаһандық өзгерістер мен қарқынды көші-қон ағындары дәуірінде ешбір ғылыми пәннің өздігінен, басқа пәндерден оқшау дами алмайтынына назар аударды.
Оның пікірінше, тұрақты даму үшін пәнаралық стратегиялар мен кешенді әрекет ету қажет. Бұл стратегиялар жаһандық сипатта болуы шарт, бірақ сонымен қатар жергілікті жағдайларды ұқыпты ескеру өте маңызды, себебі қазіргі әлеуметтік жұмыстың рөлі әлеуметтік саясатта да, қоғамдық денсаулық сақтау саласында да, адамдардың күнделікті өмірінде де орасан зор екенін атап өтті. Дәл осы себепті әртүрлі елдер мен кәсіби қауымдастықтардың дауыстарын біріктіру өте маңызды мәселе болып табылады.
Талқылаулардың негізгі тақырыбы ҚазҰУ мен PolyU бірлескен Тұрақты даму орталығының тәжірибелік нәтижелері болды. Бұл құрылым инновациялық жұмыс әдістерін енгізу үшін маңызды аймақтық алаңға айналды.
Форум барысында тараптар бірқатар халықаралық келісімдерге қол қойды.
5 мамырда, конференцияның екінші күні, 27 елден келген ғылым қайраткерлері білім беру стандарттарын үйлестірудің өзекті мәселелері мен оларды Орталық Азия жағдайына сауатты бейімдеуді талқылайды. Бұл келісімдер аймақтағы әлеуметтік жұмыс саласында заманауи кәсіби экожүйені қалыптастырудың іргетасы болады деп күтілуде.
Равиль КАСЫМОВ
Фото: Ғалия ҚАЛИЕВА
