Арнайы прокурорлар Алматыда қаңтардағы тәртіпсіздіктер кезінде полицейлерге оқ атқан төрт мергеннің бірінің кім екенін анықтады, деп хабарлайды Stan.kz ақпарат агенттігі. Бұл жөнінде бас прокуратураның қылмыстық қудалау қызметі бастығының орынбасары Елдос Қилымжанов мәлімдеді.
Сыбайластары қаза тапқан мергеннің денесін шатырдан алып, қалалық аурухананың жанына тастап кеткен, кейін оның денесі мәйітханадан табылған.
«Қаңтар оқиғасы кезінде тұрғын үйдің шатырында тұрып, Алматы қалалық ІІБ қызметкерлеріне оқ атқан С. есімді азамат болып шықты», – деді Қилымжанов.
Қалған үш лаңкестің аты-жөнін анықтау үшін жедел-іздестіру шаралары жүргізілуде.
Айта кетейік, 11 сәуір күні өткен Орталық коммуникациялар қызметінің брифингінде Елдос Қилымжанов қаңтардағы тәртіпсіздіктерге 12 ұйымдасқан қылмыстық топтың қатысқанын айтты.
