Қазақстандық эпидемиологтар инфекцияның жаңа толқынын болдырмау үшін «Алматыға карантин қажет пе» деген сұраққа жауап берді, – деп хабарлайды Tengrinews.kz тілшісі.
Қазақстанның Профилактикалық медицина академиясының президенті, профессор Алмаз Шарман қазір елде, негізінен BA-2 және BA-3 нұсқалары айналыста екенін айтты. Мұның бәрі «омикрон» штамының нұсқасы. Қазір АҚШ пен Еуропа елдерінде «омикрон» нұсқалары басым – BA-3, BA-4, BA-5. Ғалымның айтуынша, олар өте жұқпалы, бірақ ауру жеңіл өтеді. Алайда қарттар мен созылмалы аурулары бар науқастарда асқыну қаупі жоғары.
«Әрине, оларды әлі де бақылауымыз керек, бірақ қазір бұл дельта штамының нұсқалары сияқты агрессив емес екенін көруге болады. Алдағы уақытта адамдар ауруханаға көп түсіп, ауыр жағдайлар көбейсе, әдеттегі карантин шараларын қолдану қажет болады, бірақ қазіргі уақытта карантин туралы айту ерте», – деді Алмаз Шарман.
Сонымен қатар, маман осы штамдар аса жұқпалы болғандықтан, созылмалы аурулары бар адамдарға немесе қарт кісілерге қоғамдық орындарға және адамдар көп жиналатын орындарға баруды шектеу керек дейді. Бірақ жастар бұл кеңесті ұстануы екіталай екенін де жоққа шығармайды. Профессор осы кезеңде қатаң карантин қолдану мүмкін емес және қауіпсіздік бойынша ұсыныстармен шектелген жөн деп санайды. Мысалы, қоғамдық орындарда өз денсаулығына алаңдайтын адамдарға маска таққан дұрыс.
Қоғамдық медицина саласындағы маманның айтуынша, аурудың қазіргі өсуі бірнеше факторға байланысты. Бұрын ауырған немесе вакцина алған көп адамның иммундық қорғанысы біртіндеп әлсірей бастады. Бұл вирустың неғұрлым жұқпалы нұсқасының пайда болуымен және айналымымен сәйкес келді. Алмаз Шарман вирус қай маусымда күшейетіні әлі анықталмағанын айтты. Ол ауру жағдайлары Қазақстанда ғана емес, Еуропа мен АҚШ-та да байқалатынын еске салды.
«Халықтың бір бөлігі қайтадан ауырып, вакциналардың жаңа түрі жасалғанда, ауру қайтадан төмендейді. Менің ойымша, Денсаулық сақтау министрлігі халықты вакциналаудың жаңа науқаны басталмай тұрып, «омикронға» қарсы нақты вакцина ұсынылғанша немесе әмбебап вакцина жасалғанша күтуі керек. Бұл кезеңде ешқандай вакцина алмаған адамдар екпе салдыруы керек. Осылайша, олар асқыну қаупін азайта алады. Вирус мутацияға ұшырайды және жаңа нұсқалар үнемі пайда бола береді. Уақыт өте келе біз әр маусымда тұмау сияқты вакциналардың жаңа нұсқаларын алып отырамыз деп ойлаймын», – деп толықтырды профессор Алмаз Шарман.
School of Medicine Caspian University профессоры, эпидемиолог Рафаиль Қыпшақбаев та осыған ұқсас пікір білдірді және коронавирус жұқтыру күрт өскеніне қарамастан, ауыр науқастар мен жасанды тыныс алу аппаратына қосылған адамдар туралы ақпарат жоқ екенін атап өтті. Бұған дейін Қыпшақбаев коронавирус қыс мезгіліндегі тұмау сияқты, әлсірейтін немесе үдейтін маусымдық ауруға айналуы керек екенін айтқанын еске салды.
Оның пікірінше, инфекцияның мұндай көрсеткіші қоғамдық орындарға немесе дүкендерге баруға шектеу қоюға жеткілікті себеп емес. Тек ақпараттық-түсіндіру жұмыстарын жүргізіп, адамдар көп жиналатын орындарға жиналмауға және бетперде тағуға шақыру керек. Ғалым вирустық мутацияларды эпидемия және маусымдық құбылыс ретінде қарастыру керек екенін атап өтті. Адамдар өз денсаулығына төнетін қауіпті түсінуі керек. Қант диабеті, артық салмақ, созылмалы жүрек жеткіліксіздігімен және басқа да аурулармен ауыратын қауіп тобындағы адамдар мұқият болу керек.
«Сонымен қатар, шағын және орта бизнесті тыйымдар мен шектеулермен қорқытудың қажеті жоқ, егер былтырғы жағдайды салыстыратын болсақ, бәрін сынақ және қателесу арқылы жасадық. Терапияны дұрыс анықтай алмадық. Ол кезде біліміміз аз еді, сондықтан жалпы карантинді енгізу инфекцияның жолына тосқауыл қоюдың дұрыс шараларының бірі болды. Қазіргі уақытта жинақталған білім көлемі көбірек және біз бұл індетті ақырында жеңе аламыз. Тағы бір жайт, адамдар жауапкершілікті сезініп, өз денсаулығына өзі жауапты екенін түсінуі керек. Тәуекел тобына жататын болсаңыз, қыдыруды шектеп, бетперде киіп, басқа да қауіпсіздік шарттарын сақтауыңыз керек», – деп қосты Рафаиль Қыпшақбаев.
Эпидемиолог бетперде тағуды міндетті түрде енгізу қажет емес екенін атап өтті. Масканы ең алдымен, өзін нашар сезінген немесе созылмалы аурулары бар адамдар киген жөн. Ол үшін халықты бетперде тағуға міндеттемей, түсіндіру жұмыстарын жүргізу қажет.
Рафаиль Қыпшақбаев аурудың ошақтарымен күресу үшін мезгіл-мезгіл вакциналау қажет деп санайды, бірақ оны бастамас бұрын қолда бар вакциналардың вирустың қазіргі штамына қаншалықты әсер ететінін тексеру қажет.
«Нарықтағы вакциналардың тиімділігін көрсететін кем дегенде зерттеулер болуы керек. Вакцинация әрқашан жалпы ауруды төмендетеді. Қазіргі штамдар азды-көпті дәрежеде бір штамның нұсқалары саналады. Сондықтан вакцинация науқаны қатар жүруі керек. Бұл штамға қарсы вакциналардың қаншалықты тиімді екенін анықтау керек», – деді эпидемиолог.
Еске салайық, 9 шілдеде Алматы «сары» аймаққа кірген болатын.
