Алматыдағы «Сергек» камералары соңғы үш жылда қанша ақша әкелгені белгілі болды, – деп хабарлайды Tengrinews.kz тілшісі.
Оның мөлшері қалалық мәслихаттың кезектен тыс сессиясында айтылды.
Мәслихат сессиясында Алматының цифрландыру басқармасының басшысы Олжас Жаңабектің айтуынша, «Сергек» жобасының нәтижесі оң және «әлеуметтік-экономикалық тиімділік бар».
«2020 жылдан бастап бүгінгі күнге дейін «Сергек» жол қозғалысы ережесі бойынша 4 миллион 996 мың 691 әкімшілік құқық бұзушылық тіркеді. 35 миллиард 614 миллион 748 мың теңге айыппұл салынды. Жергілікті бюджетке 27 миллиард 532 миллион 297 мың теңге өндірілді», – деді Жаңабек.
Сондай-ақ, Бас прокуратураның Құқықтық статистика және арнайы есепке алу комитетінің деректеріне сәйкес, 2022 жылдың қорытындысы бойынша 2019 жылмен салыстырғанда ЖКО саны 17 пайызға төмендеді, жолдардағы өлім-жітім 40 пайызға төмендеді, жараланғандар саны 30 пайызға төмендеді.
«Алматы жол қозғалысы қауіпсіздігінің және талдауының интеллектуалды жүйесі» мемлекеттік-жекеменшік әріптестік жобасы аясында қалада барлығы 7900-ге жуық «Сергек» камерасы орнатылған.
