Келісім комиссиясының мүшелері кеншілердің 12 талап-арызын қарап, әр мәселе бойынша өз құзыреттеріне сәйкес шешім қабылдады деді Қарағанды облысының әкімі Жеңіс Қасымбек. Бұл жайында Stan.kz ақпарат агенттігі хабарлайды.
«Комиссия жұмысының барысында жаңа сұрақтар көбейе түсті, олардың саны 12-ден әлдеқайда көп болды. Басшылық түсінік танытып, барлық мәселелер бойынша шешімдер қабылданды. Шешімдер қолайлы, біз кеншілермен кездесіп, әр мәселе бойынша түсініктемелер беріп, өзара түсіністікке қол жеткіздік», – деді Жеңіс Қасымбек.
Комиссия жұмысының қорытындысы бойынша келесі шешімдер қабылданған:
– Желтоқсан айында кеншілер мен металлургтердің жалақысы 15-17 пайызға артады;
– 31 желтоқсанға дейін кадр мәселесі шешіледі. Толық штаттық деңгейге жеткенше ай сайын 100 адам қабылданатын болады;
– Кеншілерді тасымалдайтын ескірген автобустар 1 желтоқсанға дейін ауыстырылады. Келер жылы Саран қаласындағы зауыттан жаңалары сатып алынады;
– Жалақыны индекстеу жыл сайын 1 қаңтардан бастап инфляция деңгейінің 100 пайызында жүзеге асырылатын болады;
– 13-ші жалақы жоспардың орындалуына қарамастан жыл соңында төленеді;
– Зейнетақы мәселесі республикалық деңгейде шешілетін болады, бұл келісім комиссиясының құзыретіне жатпайды;
– Көмір департаментінің директоры Андрей Черномаз қызметінен кетпейді;
– 2018 жылдың 1 қаңтарынан кейін жұмысқа орналасқан қызметкерлердің демалыс күндерінің саны ұлғайтылады;
– Ұзақ уақыт ауруға шалдыққандар үшін еңбекке жарамсыздық парағы төлемі 50 АЕК-ке дейін көтеріледі;
-Кен аймағында техникалық аудит жүргізіп, ескірген жабдықты пайдаланудан шығарады;
– Жоспарлау тапсырмалары тау-кен және геологиялық жағдайларға байланысты түзетілетін болады.
Сонымен қатар кеншілердің баспана мәселесін шешуге көмектесу үшін келісім комиссиясы «Отбасы банкімен» бірлесіп, жеңілдетілген несие беру бағдарламасын қолға алу туралы шешім қабылдады. Қарағанды облысының кеншілері тұрғын үй алу үшін жылдық 5 пайызбен несие алу мүмкіндігіне ие болады. Облыс әкімі 2022 жылға арналған бюджетте бағдарламаны жүзеге асыруға қаржы қазірдің өзінде салынып жатқанын атап өтті.
Абай кенішіндегі қайғылы оқиғадан кейін зардап шеккен кеншілердің әріптестері «АрселорМиттал Теміртау» компаниясының басшылығы мен облыс басшылығына бірқатар талаптар қойған болатын. Олар 12 тармақтан тұратын тізім жасаған. Кеншілер кәсіподағының өкілі бұл мәселелерді тез арада шешу керектігін айтқан.
Осы мәселелерді шешу үшін облыс әкімі Жеңіс Қасымбек басқаратын келісім комиссиясы құрылды. Оның құрамына көмір департаментінің барлық сегіз шахтасының еңбек ұжымдарының делегаттары, «АрселорМиттал Теміртау» компаниясының басшылығы, кәсіподақ және мемлекеттік органдардың өкілдері кірген.
