Есет Бәйкен мен Берік Жәкенов Нұр-Сұлтан қаласы әкімінің орынбасарлары болып тағайындалды, деп хабарлайды Stan.kz ақпарат агенттігі.
«Асхат Оралов пен Асқар Әмриннің басқа жұмысқа ауысуына байланысты елорда әкімінің орынбасарлары тағайындалды. Президент әкімшілігімен келісе отырып, меритократия қағидаты бойынша бұл қызметке Сарыарқа ауданының экс-әкімі Есет Байкен мен Есіл ауданының бұрынғы әкімі Берік Жәкенов тағайындалды», – делінген хабарламада.
Есет Бәйкен еңбек жолын Астана қаласының экономика және бюджеттік жоспарлау басқармасында жетекші маман болып бастаған. Осы жылдары елорда әкімі аппаратының әлеуметтік-мәдени сала бөлімінің бас маманы, бас инспектор, елорда әкімі аппаратының ұйымдастыру-инспекторлық бөлімінің меңгерушісі қызметтерін атқарды.
2016-2019 жылдары президент әкімшілігі басшысы хатшылығының сарапшысы, президент Әкімшілігінің мемлекеттік бақылау және ұйымдастыру-аумақтық жұмыс бөлімінің мемлекеттік инспекторы, Қарағанды облысы Нұра ауданының әкімі, бөлім басшысы қызметтерін атқарған. Нұр-Сұлтан қаласы әкімі аппаратының. 2020 жылдан бастап Сарыарқа ауданының әкімі қызметін атқарды.
Берік Жәкенов еңбек жолын 2000 жылы Көкшетау қаласының салық полициясында қызмет етуден бастаған. 2002-2007 жылдары Теміртау қаласы бойынша Салық комитетінің жетекші және бас маманы қызметтерін атқарған. Сондай-ақ әр жылдары Қарағанды облысының әкімдігінде, Қаржы министрлігінде қызметтер атқарған.
2015 жылы президент әкімшілігі басшысы хатшылығы меңгерушісінің орынбасары болып тағайындалды. 2016 жылдан бастап Нұр-Сұлтан қаласы әкімі аппаратының басшысы, 2019 жылдан бастап Нұр-Сұлтан қаласындағы Есіл ауданының әкімі болып жұмыс істеді.
